Пра сайт | About

Гэты вэб-сайт служыць усёй беларускай супольнасьці ў Вялікабрытаніі. Ён не належыць ніводнай арганізацыі, але служыць патрэбам ды інтарэсам беларусаў, беларускіх ініцыятываў і арганізацыяў. Праз распаўсюд іфармацыі мы імкнемся садзейнічаць усяму цікаваму й карыснаму, што нараджаецца ў беларускім жыцьці.

Электронная пошта для кантактаў: editor[сьлімак]belarusians.co.uk

Сайт пачынаўся з адной старонкі пра Беларускую каталіцкую місію ў Лёндане. Было гэта ў жніўні 1999 г. Другой старонкі чакаць доўга не давялося. Яна была пра Скарынаўскую бібліятэку; тады ж быў створаны “сайт-парасонік” для ўсіх нашых далейшых пачынаньняў – “Беларусы ў Вялікай Брытаніі”.

У 2000 г. мы напісалі, што сайт створаны для ўсёй беларускай супольнасьці ў Вялікабрытаніі і не належыць ніводнай паасобнай арганізацыі; што ўсе беларусы і нашыя брытанскія сябры могуць карыстацца ім дзеля пашырэньня сваіх ідэяў і ініцыятываў, але пры адной ўмове, што яны хацелі б, як і мы, бачыць Беларусь вольнай і дэмакратычнай. Стваралі вэб-сайт два студэнты зь Лёндану. Аднаго імя Ігар, другога – Павел.

Цягам некалькіх гадоў сайт існаваў толькі па-ангельску – нашыя веды пра інтэрнэт былі надзвычай сьціплыя, так што мы ня ведалі, як прымусіць ня вельмі новы Макінтош пісаць па-беларуску так, каб і карыстальнікі Віндаўзу маглі прачытаць. Дзякуй Скарынаўскай бібліятэцы й Каталіцкай місіі, без падтрымкі якіх сайту не было б зусім.

За два гады на сайтах пад парасонікам “Беларусаў у Вялікай Брытаніі” зьявілася звыш 200 старонак: артыкулы а.А. Надсана, дыскусіі пра наступствы Чарнобыля, матэрыялы Англа-беларускага таварыства і Таварыства Беларусь-Ірляндыя, публікацыі з штомесячнага Belarusian News Bulletin.

Нам часта даводзілася чуць ад наведвальнікаў бібліятэкі ў Лёндане і ўдзельнікаў беларускіх вечарынаў і сьвяткаваньняў, што яны даведаліся пра беларускае жыцьцё ў Брытаніі праз гэты сайт. У гэтым і заключаецца нашая адзіная мэта – дапамагчы беларускаму жыцьцю не загаснуць на Імглістым Альбіёне.